தமிழக அரசியலில் நடிகர் விஜய் மற்றும் அவரது தமிழக வெற்றி கழகத்தின் வருகை பெரும் எதிர்பார்ப்பை ஏற்படுத்தியுள்ள நிலையில், மே 4-ஆம் தேதி வரப்போகும் தேர்தல் முடிவுகளுக்காக ஒட்டுமொத்த மாநிலமும் ஆவலுடன் காத்திருக்கிறது.

தனது சினிமா பிம்பத்தைத் தாண்டி, அரசியல் களத்தில் தனக்கிருக்கும் செல்வாக்கை நிரூபிக்க வேண்டிய கட்டாயத்தில் இருக்கும் விஜய், தற்போது இறைவழிபாடுகளில் அதிக கவனம் செலுத்தி வருகிறார்.

அவர் சாய்பாபா மற்றும் முருகர் கோவில்களுக்குச் சென்று வழிபடும் அதே வேளையில், அவரது கட்சியினரும் மதம் கடந்து தேவாலயங்கள் மற்றும் மசூதிகளில் பிரார்த்தனைகளில் ஈடுபட்டு வருவது தவெக-வின் தேர்தல் வெற்றிக்கான தீவிரத்தை காட்டுகிறது.

இந்தச் சூழலில், சென்னை நீலாங்கரையில் உள்ள விஜய் வீட்டின் வாசலில், வள்ளலார் கொள்கைகளைப் பின்பற்றுபவர் போல வெண்ணிற ஆடை அணிந்த மூதாட்டி ஒருவர் விடிய விடிய தியானத்தில் ஈடுபட்டது பெரும் பரபரப்பை ஏற்படுத்தியது.

விஜய்யைச் சந்திக்கவே அவர் இப்படிச் செய்கிறார் என்று பலரும் கருதிய நிலையில், அவரிடம் நலம் விசாரிக்கச் சென்றவர்களிடம் அந்த மூதாட்டி மிகவும் முரட்டுத்தனமாகப் பேசியது அங்கிருந்தவர்களை அதிர்ச்சியில் ஆழ்த்தியது.

தனக்கு தலைசுற்றுவதாகக் கூறிய அந்த மூதாட்டியிடம், உணவு உண்ண வருமாறு அழைத்த ரசிகரை நோக்கி, “எனக்கு தலைசுற்றினால் உனக்கு என்ன?” என்று அவர் தடாலடியாகக் கேட்டது, விஜய்யைச் சந்திக்க அவர் கையாண்ட விசித்திரமான அணுகுமுறையை வெளிப்படுத்தியது.

விஜய்யின் ரசிகர்கள் மற்றும் ஆதரவாளர்கள் மத்தியில் இந்தச் சம்பவம் பெரும் கவலையை ஏற்படுத்தியுள்ளது. அந்த மூதாட்டி உணவு ஏதும் உட்கொள்ளாமல் வீட்டின் முன் மயங்கி விழுந்தால், அது தேவையில்லாமல் விஜய்யின் பெயருக்குக் களங்கத்தை ஏற்படுத்தும் என்று அவர்கள் அஞ்சுகிறார்கள்.

மேலும், இது போன்ற செயல்களை அனுமதித்தால், எதிர்காலத்தில் விஜய்யைச் சந்திக்க பலரும் வீட்டின் முன் இதுபோல தர்ணாவில் ஈடுபடும் தவறான முன்னுதாரணம் உருவாகி விடும் என்றும், எனவே அந்த மூதாட்டியை விஜய் சந்திக்காமல் இருப்பதே முறையானது என்றும் சமூக வலைதளங்களில் விவாதங்கள் எழுந்துள்ளன.